रशियाने युक्रेनयुद्ध अजून संपण्याच नाव घेत नाहीये. रशिया तीव्रतेने युक्रेनवर हल्ले करत आहे. अशातच, अमेरिकेचे राष्ट्राध्यक्ष जो बायडन यांनी मोठी घोषणा केली आहे. अमेरिकेच्या ‘स्टेट ऑफ द युनियन’ला संबोधित करताना त्यांनी रशियावर जोरदार टीका केली. युक्रेनवर हल्ला करून पुतीन यांनी घोडचूक केली आहे. रशियाची आणखी आर्थिक कोंडी करणार असून अमेरिकेची हवाई हद्द रशियासाठी बंद करण्यात आल्याची घोषणा बायडन यांनी केली आहे. युक्रेनवर अमेरिकेचे सैन्य उतरवण्याबाबत त्यांनी सूचक वक्तव्य केले. आपल्या भाषणात जो बायडन यांनी युक्रेनचे कौतुक केले. रशियाने युक्रेनकडून एवढ्या मोठ्या प्रतिकाराची अपेक्षाच केली नसणार असेही बायडन यांनी म्हटले.
नक्की काय म्हणालेत अमेरिकेचे राष्ट्राध्यक्ष जो बायडन ?
बायडन म्हणाले की, आम्ही नाटो देशांच्या सुरक्षेसाठी वचनबद्ध आहोत. युक्रेनला मदत करण्यासाठी आम्ही शक्य ते सर्व प्रयत्न करत आहोत. मात्र, बायडन यांनी स्पष्ट केले की आमचे सैन्य युक्रेन-रशियन युद्धात सहभागी होणार नाही.
युरोपियन युनियन एकजूट आहे. आम्हाला युक्रेनच्या लोकांचा अभिमान आहे. आता हुकूमशहाला त्याच्या कृत्याबद्दल शिक्षा करणे खूप महत्वाचे आहे. पुतिन यांनी युक्रेनवर जाणूनबुजून हल्ला केला आहे. रशियावर लागू करण्यात आलेल्या आर्थिक निर्बंधांमुळे तो आणखी कमकुवत होणार असल्याचे त्यांनी म्हटले.
बायडन यांनी रशियाचे राष्ट्रपती व्लादिमीर पुतीन यांच्यावर हल्ला बोल केला. पुतीन सध्या जगात एकटे पडले आहेत. यापूर्वी ते कधीही इतके एकटे पडले नव्हते. युरोपियन युनियनचे सुमारे 27 देश सध्या युक्रेनसोबत असल्याचेही बायडन यांनी सांगितले.
युक्रेनला अमेरिका एक अब्ज डॉलर्सची मदत देणार असल्याची घोषणा बायडन यांनी केली.
रशियाने पुकारलेल्या युद्धाची किंमत त्यांना मोजावी लागणार आहे. आम्ही रशियावर आर्थिक निर्बंध लागू करत आहोत असे बायडन यांनी सांगितले. फक्त अमेरिकाच नव्हे तर जगातील इतर अनेक देश युक्रेनसोबत उभे असल्याचे त्यांनी म्हटले. अमेरिकेने रशियाची हवाई हद्द बंद केली असल्याची घोषणा त्यांनी केली.
