असं शत्रूसोबतही घडू नये! लग्नानंतर काही तासातच नवरी-नवरदेवाचा मृत्यू, काय झालं?

पाटणा 07 मे : लग्न हा प्रत्येकाच्या आयुष्यातील अतिशय खास आणि आनंदाचा क्षण असतो. मात्र, आता एक अतिशय हृदयद्रावक घटना समोर आली आहे. यात लग्नानंतर अवघ्या काही तासातच नवरी आणि नवरदेव दोघांचाही दुर्दैवी मृत्यू झाला. या घटनेमुळे क्षणभरातच दोन्ही कुटुंबांचा आनंद दुःखात बदलला. ही घटना बिहारच्या नालंदा जिल्ह्यातील आहे. नवरदेव आपल्या वधूला घेऊन जात असलेल्या कारला भरधाव वेगाने येणाऱ्या ट्रॅक्टरने धडक दिली. या अपघतात गाडी रस्त्याच्या खाली गेली आणि यात वधू-वर जागीच ठार झाले.

या अपघातात नवरदेवाचा दाजीही गंभीर जखमी झाला आहे. पोलिसांनी गुन्हा दाखल करून ट्रॅक्टरसह फरार चालकाचा शोध सुरू केला आहे. ही घटना नालंदातील गिरियक पोलीस स्टेशन हद्दीतील पुरेनी गावाजवळ घडली. शुक्रवारी गिरियकच्या सतुआ गावातील कारू चौधरी यांची मुलगी पुष्पा कुमारी (20 वर्षे) हिचा विवाह नवादा येथील महराना गावातील रहिवासी श्याम कुमार (27 वर्षे) याच्याशी झाला. शनिवारी दुपारी पुष्पाला निरोप देण्यात आला. इनोव्हा कारमधून श्याम आपली नववधू पुष्पा आणि दाजीसह महराना गावाकडे निघाला होता.

नवरीसोबत रूममध्ये गेला अन् तिथेच भयानक घडलं; लग्नानंतर दुसऱ्याच दिवशी नवरदेवाचा मृत्यू

दुपारी 3-4 वाजण्याच्या दरम्यान त्यांची कार पुरैनी गावाजवळ आली असता भरधाव वेगात असलेल्या वाळूने भरलेल्या ट्रॅक्टरने कारला जोरदार धडक दिली. यामुळे कार रस्त्यावरून खाली गेली. यात श्याम आणि पुष्पा यांचा जागीच मृत्यू झाला. तर श्यामचा दाजी आणि गाडीचा चालक गंभीर जखमी झाला.

घटनेची माहिती मिळताच पोलिसांनी घटनास्थळ गाठून वधू-वरांचे मृतदेह शवविच्छेदनासाठी पाठवले, तर गंभीर जखमी असलेल्या व्यक्तीला उपचारासाठी विम्स येथे दाखल केलं. कारला धडक दिल्यानंतर आरोपी चालक ट्रॅक्टरसह पळून गेला. याप्रकरणी पोलिसांनी गुन्हा दाखल करून तपास सुरू केला आहे.

या घटनेची माहिती कुटुंबीयांना समजताच सर्वत्र शोककळा पसरली. सुखाचं वातावरण क्षणार्धात दु:खात बदललं. सतोआमध्ये दररोज मोठ्या प्रमाणात अवैध वाळू उत्खनन होत असल्याचं ग्रामस्थांचं म्हणणं आहे. वाळू उत्खनन करणारे लोक ट्रॅक्टरमधून वाळू भरून सुसाट वेगाने वाहने चालवतात. त्यामुळे दररोज अपघात होत आहेत. अवैध वाळू उपसा करणाऱ्यांशी पोलिसांचीही मिलीभगत असल्याचा आरोप ग्रामस्थांनी केला आहे.