राष्ट्रवादी काँग्रेसचे नेते नवाब मलिक यांच्या संपत्ती ईडीने जप्त केल्या आहे. नवाब मलिक यांच्या आठ संपत्तीवर ईडीने टाच आणली आहे. यामध्ये कुर्ला पश्चिमेतील व्यावसायिक जागा, उस्मानाबादमधील 148 एकर जमिनीचा समावेश आहे. मनी लॉण्ड्रिंग प्रकरणात ही कारवाई करण्यात आली आहे.
नवाब मलिक यांच्या कोणकोणत्या मालमत्ता जप्त ?
*कुर्ला पश्चिमेतील व्यावसायिक जागा
*कुर्ला पश्चिमेतील तीन फ्लॅट्स
*कुर्ल्यातील गोवावाला कम्पाऊंड
*वांद्रे पश्चिमेतील दोन फ्लॅट्स
*ठाण्यातील संपत्ती
*उस्मानाबादमधील 148 एकर जमीन
‘ईडी’ने दाऊदचा भाऊ इक्बाल कासकरला ताब्यात घेऊन चौकशी केली. दाऊदच्या हस्तकाशी संबंधित असलेल्या सुमारे 300 कोटींच्या मालमत्तेचा व्यवहार करणाऱ्या कंपनीशी नवाब मलिक यांचा संबंध असल्याचं ईडीला तपासात आढळलं आहे. त्यानुसार ईडीने कारवाई करत नवाब मलिक यांना 23 फेब्रुवारी रोजी अटक केली. मात्र ईडीनं केलेली आपली अटक ही बेकायदेशीर असल्याचा दावा करत ईडीनं नोंदवलेला गुन्हा आणि पीएममएलए न्यायालयाच्या आदशेला हायकोर्टात आव्हान दिलं होतं. आपली तात्काळ सुटका करण्यात यावी, अशी मागणी करणारी फौजदारी याचिका नवाब मलिक यांनी दाखल केली होती. आपल्या विरोधात निव्वळ राजकीय सूड उगविण्यासाठीच केंद्रीय तपासयंत्रणांचा वापर होत असल्याचंही मलिक यांनी या याचिकेत म्हटलेलं होतं.
