ऑलिम्पिकमध्ये जिंकलं सिल्व्हर मेडेल अन् गोव्यात विकतेय गांजा, NCB ची मोठी कारवाई

विजय वंजारा, प्रतिनिधी

मुंबई, 29 एप्रिल : ऑलिम्पिकमध्ये सिल्व्हर मेडेल मिळवणारी महिला आणि माजी पोलीस अधिकारी गोव्यात गांजा विकताना आढळल्याने खळबळ उडाली आहे. धक्कादायक म्हणजे यातील एका अंमली पदार्थाचे उत्पादन ते घरातच करत होते. गोव्यातील अरामबोल आणि त्याच्या लगतच्या भागात एनसीबीच्या गोवा युनिटने ही कारवाई केली आहे. या प्रकरणात दोन रशियन नागरीक आणि एका स्थानिकाला अटक करण्यात आली आहे.

काय आहे प्रकरण?

गुप्त माहितीनुसार, गोव्याच्या अरामबोल भागात एक रशियन नागरीक ड्रग्ज कार्टेल सक्रियपणे चालवत असल्याची माहिती मिळाली होती. स्थानिक आरोपी आकाश एका मोठ्या नेटवर्कचा भाग असून तो कार्टेलचा प्रमुख म्हणून काम करणाऱ्या रशियन व्यक्तीच्या सूचनेनुसार काम करत होता, असे त्याने सांगितले. त्यानंतर आकाशवर पाळत ठेवण्यास सुरुवात झाली. तपासानंतर आंद्रे नावाच्या रशियन नागरिकाला पकडण्यात आले. त्याच्याकडून 20 एलएसडी ब्लॉट्स जप्त करण्यात आले. चौकशीदरम्यान तो आपल्या निवासस्थानी हायड्रोपोनिक तण उगवत असल्याचे आढळले, अशी माहिती एनसीबी पथकाने दिली.

वाचा – मामाकडे जायचं नाही म्हणत मुलाने आईच्या छातीवर तब्बल 83 वेळा चाकू मारला अन्

त्यानंतर त्याच्या घरातून हायड्रोपोनिक तणांच्या झाडाच्या कुंड्या जप्त करण्यात आल्या. संपूर्ण कारवाईदरम्यान 88 एलएसडी ब्लॉट्स, 8.8 ग्रॅम कोकेन, 242.5 ग्रॅम चरस, 1.440 किलो हायड्रोपोनिक विड, 16.49 ग्रॅम हॅश ऑइल, 410 ग्रॅम हॅश केक यासह विविध प्रकारचे ड्रग्ज जप्त करण्यात आले असून 4.88 लाख रुपयांचा मुद्देमाल जप्त करण्यात आला आहे.  एनसीबीने भारतीय आणि विदेशी चलने, बनावट कागदपत्रे, आयडी आणि हायड्रोपोनिक तण वाढवण्यासाठी लागणारी सामग्री देखील जप्त केली आहे.

अटक करण्यात आलेली रशियन महिला, एस वर्गनोव्हा ही 1980 च्या जलतरणात ऑलिम्पिक रौप्यपदक विजेती आहे, तर आंद्रे हा रशियाचा माजी पोलिस कर्मचारी आहे. तो गोव्यात दीर्घकाळापासून ड्रग कार्टेल चालवत होता. त्याने अनेक शहरांना भेटी देऊन त्याचा प्रसार केला होता. नेटवर्क आणि रस्त्यावरील पेडलर्सचे चांगले पसरलेले नेटवर्क मॅनेज करत होता. रशियन नागरिकांसोबत स्थानिक नागरिक आकाशलाही अटक करण्यात आली आहे. यासंदर्भात अधिक तपास सुरू असल्याचे अधिकाऱ्याने सांगितले.