मुंबई, 17 मे : समीर वानखेडे प्रकरणात मोठी बातमी समोर येत आहे. कॉर्डलिया क्रूझ ड्रग्स प्रकरणात समीर वानखेडे यांच्याकडून व्हेकेशन कोर्टात रिट पिटीशन दाखल करण्यात आली आहे. न्यायमूर्ती शर्मिला देशमुख, न्यायमूर्ती अरिफ एस डॉक्टर यांच्या खंडपिठासमोर तातडीनं या प्रकरणावर सुनावणी करण्यात यावी अशी विनंती समीर वानखेडे यांनी आपल्या याचिकेमध्ये केली आहे. त्यांची विनंती मान्य करण्यात आली आहे. आज दुपारी आडीच वाजता या प्रकरणावर सुनावणी होणार आहे.
विधिज्ञ रिझवान मर्चंट, आबाद पोंडा हे समीर वानखेडे यांची बाजू मांडणार आहेत. दिल्ली उच्च न्यायालयानं 22 मेपर्यंत वानखेडे यांना सीबीआय चौकशीपासून दिलासा दिला आहे. सीबीआयच्या एफआयआरमध्ये वानखेडे यांच्याविरोधात गंभीर आरोप करण्यात आले आहेत. त्यामुळे वानखेडे यांच्या अडचणीत चांगलीच वाढ झाली आहे.
काय आहेत एफआयआरमध्ये आरोप?
तुमच्या शहरातून (मुंबई)
सीबीआयकडून समीर वानखेडे यांच्यावर गुन्हा दाखल करण्यात आला आहे. सीबीआयकडून या प्रकरणात गुन्हा दाखल करताना कॉर्डलिया क्रूझ ड्रग्स प्रकरणाचा वृत्तांत सादर करण्यात आला आहे. सीबीआयच्या एफआयआरमध्ये अनेक गंभीर आरोप करण्यात आले आहेत. आरोपी समीर वानखेडे आणि इतर जणांनी हा कट कसा रचला याबद्दलची माहिती सीबीआयच्या एफआयआरमध्ये नमूद करण्यात आली आहे.
आर्यन खान एनसीबीच्या आणि खास करून आरोपी आणि पंच असलेल्या किरण गोसावीच्या ताब्यात आहे, हे दाखवण्यासाठीच आर्यनचा ताबा के पी गोसावीला देण्यात आला होता. वानखेडे यांच्या आदेशानुसारच के पी गोसावी आर्यनला घेऊन एनसीबी कार्यालयात आला होता, असं सीबीआयच्या एफआयआरमध्ये नमदू करण्यात आलं आहे.एनसीबीच्या कार्यपद्धतीच्या बाहेर असूनही एका पंचाला अशा कारवाईवेळी मुक्तपणे वावरण्याचे आणि एनसीबी कार्यालयात येण्याचे अधिकार वानखेडे यांनी दिले. आरोपी असलेले समीर वानखेडे आणि आशिष रंजन यांनी त्यांच्या घोषित केलेल्या मालमत्तेपेक्षा अधिक संपत्ती मिळवली, असं सीबीआयनं म्हटलं आहे.
मराठी बातम्या, ब्रेकिंग न्यूज मराठीत सर्वात आधी News18 लोकमतवर.
आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट News18 लोकमतवर.
