तेलंगणा, 08 मे : तेलंगणामधून एक धक्कादायक आणि संतापजनक बातमी समोर आली आहे. एका डॉक्टराने 7 वर्षांच्या मुलावर उपचार करताना जखमेवर चक्क फेवीक्विक लावल्याचा प्रकार समोर आला आहे. या मुलाच्या डोक्याला जखम झाली होती. पण, या डॉक्टराने जखमेवर फेव्हीक्विक लावले होते. या प्रकारामुळे संताप व्यक्त केला जात आहे.
मिळालेल्या माहितीनुसार, कर्नाटकातील रायचूर जिल्ह्यातील लिंगसुगर इथं राहणाऱ्या वामसी कृष्णा, त्यांची पत्नी सुनिता आणि त्यांचा मुलगा प्रवीण चौधरी (7) यांच्यासह तेलंगणातील जोगुलांबा गडवाल जिल्ह्यातील एका लग्नासंभारभात आले होते. यावेळी खेळत असताना मुलाच्या डोक्याला दुखापत झाली. डाव्या डोळ्यावर कोच पडली होती. त्यामुळे त्याला तातडीने गावातील डॉक्टर नागार्जुन यांच्याकडे नेलं.
पण, या डॉक्टराने जखमेवर टाके घालण्याऐवजी चक्क फेव्हीक्विक लावलं. जखमेवर फेवीक्विक लावल्यामुळे एकच प्रवीणने आरडाओरडा सुरू केला. वेदनेमुळे तो मोठ्याने रडू लागला. आपला मुलगा का रडत आहे, हे पाहण्यासाठी गेले असता डोक्यावर फेवीक्विक लावल्याचा प्रकार समोर आला.
संतापलेल्या नातेवाईकांनी डॉक्टर नागार्जुनच्या रूममध्ये धाव घेतली आणि चांगलेच धारेवर धरलं. “तुम्ही खरोखरच एमबीबीएस डॉक्टर आहात का, डॉक्टर म्हणून तुम्हाला काही कळतं का? जखमेवर टाके टाकण्याऐवजी फेवीक्विक कसं लावलं. तुम्ही एमबीबीएस शिकत असताना हेच शिकलात का? अशी प्रश्नाची सरबत्तीच पालकांनी डॉक्टरावर केली.
(Video : बोलता बोलताच त्यांनी खुर्च्या अन् लाथाबुक्क्यांनी तुडवलं; सोलापुरातील प्रकार)
पालकांचा रौद्ररुप पाहून डॉक्टराची बोबडीच वळाली. आमच्याकडे वीज पुरवठा खंडीत झाला होता, त्यामुळे चुकून हे घडलं अशी सारवासारव डॉक्टरांनी केली. या प्रकरणी मुलाच्या आई-वडिलांनी पोलिसात तक्रार दाखल केली आहे. या प्रकरणी पोलिसांनी डॉक्टराच्या विरोधात गुन्हा दाखल केला असून अधिक तपास पोलीस करत आहे.
मराठी बातम्या, ब्रेकिंग न्यूज मराठीत सर्वात आधी News18 लोकमतवर.
आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट News18 लोकमतवर.
