गेले काही दिवस राज्यात ईडी आणि आयकर विभागाच्या धाडींचं सत्र सुरूच असल्याचं दिसून येत आहे. यात माहाविकास आघाडीतील नेत्यांचा समावेश आहे. महत्वाचे म्हणजे राज्याचे मुख्यमंत्री उद्धव ठाकरे हे ज्या पक्षाचे पक्ष प्रमुख आहेत अशा शिवसेनेतील नेत्यांच्या मागे देखील ही पीडा लागली असल्याचं दिसून येत आहे. चला तर मग बघुयात आत्तापर्यंत शिवसेनेचे कोणते नेते ईडीच्या किंवा आयकर विभागाच्या रडारवर आले आहेत
प्रताप सरनाईक
शिवसेनेचे ठाण्यातील आमदार प्रताप सरनाईक यांच्या पाठीमागे ईडीचा ससेमिरा लागला आहे. शिवसेनेचे आमदार प्रताप सरनाईक यांच्यावर ईडीने मोठी कारवाई केली आहे. प्रताप सरनाईक यांची टिटवाळ्यातील जमीन आणि ठाण्यातील दोन फ्लॅट्स अशी एकूण 11.35 कोटी रुपयांची संपत्ती ईडीने जप्त केली आहे.ईडीच्या कारवाईमुळे प्रताप सरनाईक यांना मोठा धक्का बसला आहे.गेल्या अनेक दिवसांपासून शिवसेनेचे आमदार प्रताप सरनाईक यांची ईडीकडून चौकशी सुरू आहे. त्यानंतर आता अंमलबजावणी संचालनालयाने (ईडी) ने धडक कारवाई करत ठाण्यातील 02 फ्लॅट आणि जमीन जप्त केली आहे, ज्याचे मूल्य NSEL घोटाळ्याशी संबंधित प्रकरणात प्रताप सरनाईक यांनी प्रिव्हेन्शन ऑफ मनी लाँडरिंग 2002 च्या तरतुदींनुसार 11.35 कोटी रुपये आहे. सरनाईक यांच्याबरोबरच त्यांचे पुत्र विहंग सरनाईक यांचीही ईडीकडून चौकशी सुरु होती. प्रताप सरनाईक हे ओवळा-माजिवडा मतदारसंघाचे प्रतिनिधित्व करतात. या मतदारसंघातून सलग तीनवेळा ते निवडून आले आहेत. मनी लाँडरिंगसह अन्य काही प्रकरणांत सक्तवसुली संचालनालयाकडून प्रताप सरनाईक यांची चौकशी सुरु आहे. नॅशनल स्पॉट एक्स्चेंज लिमिटेड (एनएसईएल) आणि टिटवाळा येथील एका जमीन व्यवहारात गैरव्यवहार केल्याचा आरोप प्रताप सरनाईक यांच्यावर करण्यात आला आहे. सरनाईक यांची मुले विहंग व पूर्वेश तसंच, निकटवर्तीय योगेश चंडेला यांच्यावरही या प्रकरणात ठपका ठेवण्यात आला आहे. दरम्यान, प्रताप सरनाईक हे प्रवर्तक असलेल्या टॉप सिक्युरिटी या कंपनीत ब्रिटनहून मुंबई पोहोचलेल्या परदेशी निधीचा गैरवापर झाला, असा सक्तवसुली संचालनालयाचा (ईडी) संशय आहे.
भावना गवळी
शिवसेनेच्या खासदार भावना गवळी यांच्याशी संबंधित संस्थांच्या नऊ ठिकाणांवर सक्तवसुली संचालनालयाने छापे टाकले होते. यवतमाळ-वाशिम लोकसभा मतदारसंघाच्या खासदार असलेल्या गवळी यांच्या वाशिममध्ये विविध शिक्षण संस्था व कृषी उत्पादन संस्था आहेत. या संस्थांच्या खरेदी-विक्रीत जवळपास ७२ कोटी रुपयांचा गैरव्यवहार झाल्याचा ‘ईडी’चा संशय आहे. त्या पार्श्वभूमीवर ‘ईडी’ने रिसोड व देगाव येथील महिला उत्कर्ष प्रतिष्ठान, बालाजी सहकारी पार्टिकल बोर्ड, बीएएमएस कॉलेज तसेच रिसोड तालुक्यातील भावना अॅग्रो लिमिटेड या संस्थांशी संबंधित असलेल्या नऊ ठिकाणांवर छापे टाकले. ‘गवळी यांच्याशी संबंधित या संस्थांची खरेदी-विक्री कमी-अधिक प्रमाणात झाली. काही ठिकाणी वाजवीपेक्षा अधिक रक्कम देण्यात आली आहे. तर काही व्यवहारांत अत्यल्प दराने संस्था खरेदी किंवा विक्री झाली आहे. याशिवाय वाशिम-लातूर राज्य महामार्ग कामात कंत्राटदाराकडून खंडणी वसूल झाल्याचीही माहिती आहे. त्यामध्ये गैरव्यवहार झाल्याचा संशय आहे. त्याचा तपास करण्यासाठी हे छापे टाकण्यात आले’, असे ‘ईडी’तील सूत्रांनी सांगितले.
अनिल परब
अनिल परब यांना सक्तवसुली संचालनालयाने (ईडी) मनी लाँडरिंगप्रकरणी चौकशीचे समन्स बजावले होते. माजी गृहमंत्री अनिल देशमुख यांच्यावरील १०० कोटी रुपये खंडणीच्या आरोपप्रकरणी चौकशी करायची असल्याचं ईडीने म्हटलं होतं. अनिल देशमुखप्रकरणी काही जणांची चौकशी करण्यात आली. विशेषत: बडतर्फ पोलिस निरीक्षक सचिन वाझे याच्या चौकशीत महत्त्वाची माहिती समोर आली. या माहितीनुसार, या प्रकरणात अनिल परब यांचादेखील सहभाग असल्याचा संशय आहे. मुंबई महापालिकेतील ५० कंत्राटदारांकडून प्रत्येकी दोन कोटी रुपये खंडणी गोळा करण्याची सूचना अनिल परब यांनी जानेवारी २०२१ मध्ये दिली होती, असे वाझे याने न्यायालयालाही सांगितले आहे. या सर्व माहितीनुसार, यामध्ये पैशांचा मोठ्या प्रमाणात गैरवापर झाल्याचा संशय आहे. त्यामुळेच प्रकरणाच्या प्रत्यक्ष चौकशीसाठी परब यांना हा समन्स बजावण्यात आला आहे. मुंबईतील बलार्ड पीयर येथील ईडीच्या प्रादेशिक कार्यालयात परब यांना मंगळवारी सकाळी उपस्थित राहायचे आहे’, असे ‘ईडी’तील सूत्रांनी सांगितले.
आनंदराव अडसूळ
शिवसेनेचे माजी खासदार आनंदरावर अडसूळ यांनाही ईडीने समन्स बजावले आहेत. सिटी बँक घोटाळ्याप्रकरणी ईडीने ही कारवाई केली आहे. शिवसेनेचे माजी खासदार आनंदराव अडसूळ आणि बडनेराचे आमदार रवी राणा यांच्यात लोकसभा निवडणुकीपासून संघर्ष सुरू आहे. सिटी बँक घोटाळ्याप्रकरणी आमदार रवी राणा यांनी ईडीकडे अडसुळांविरोधात तक्रार केली होती. या तक्रारीनंतर अडसुळ यांना ईडीने समन्स बजावले असून चौकशीसाठी उपस्थित राहण्याची सूचना केली होती.
राहुल कनाल
युवासेनेच्या कोअर कमिटीचे सदस्य राहुल कनाल यांच्या मुंबईतील वांद्रे येथील घरावर आयकर विभागानं छापा मारला होता. राहुल कनाल हे पर्यावरण मंत्री आदित्य ठाकरे यांचे निकटवर्तीय मानले जातात. राहुल कनाल हे सध्या शिर्डी संस्थानच्या विश्वस्तपदी असून, मुंबई महापालिकेच्या शिक्षण समितीचेही ते सदस्य आहेत.
यशवंत जाधव
शिवसेनेचे मुंबईतील नेते, मुंबई महानगरपालिका स्थायी समितीचे अध्यक्ष यशवंत जाधव यांच्या घरावर 25 फेब्रुवारी रोजी सकाळी आयकर विभागाने छापे मारले. त्यांच्या सोबत CISF ची टीमही उपस्थित होती. कोव्हिड काळातला भ्रष्टाचार, शेल कंपन्यांद्वारे केलेली गुंतवणूक यासाठी आयकर विभागाने ही छापेमारी केली. आयकर विभागाने केलेल्या तपासात कोलकाता येथील शेल कंपन्यांद्वारे झालेल्या आर्थिक व्यवहारांमध्ये शिवसेना आमदार यामिनी जाधव, त्यांचे पती यशवंत जाधव आणि त्यांच्या कुटुंबीयांनी पैसे कमावल्याचा दावा आयकर विभागाचा आहे.
या सगळ्या दरम्यान, उद्धव ठाकरे यांचे पुत्र आदित्य ठाकरे आणि पत्नी रश्मी ठाकरे यांच्यावर देखील आरोप करण्यात आले. ते ज्या कंपनीशी जोडले गेलेत त्या कंपन्या खोट्या किंवा चुकीच्या आहेत असं सांगितले जात आहे. याचबरोबर, मुख्यमंत्री उद्धव ठाकरे यांच्या पत्नी रश्मी ठाकरे यांचे मुरुड तालुक्यातील कोर्लई येथे 19 बंगले असल्याचा दावा भाजपचे नेते किरीट सोमय्या यांनी केला आहे. ही माहिती उद्धव ठाकरे यांनी लपवून ठेवली असाही आरोप सोमय्या यांचा आहे.कोर्लई गावाचे सरपंच प्रशांत मिसाळ यांनी मात्र हा दावा फेटाळला असून याठिकाणी बंगले नसल्याचं म्हटलं आहे. याची पाहणी करण्यासाठी काही दिवसांपूर्वी किरीट सोमय्या यांनी कोर्लई गावाला भेटही दिली होती. बंगले नाहीत मग रश्मी ठाकरे यांचे बंगले हरवले का? असा प्रश्न किरीट सोमय्या यांनी उपस्थित केला आहे. शिवसेनेचे खासदार संजय राऊत यांनी पत्रकार परिषदेत कोर्लई गावात रश्मी ठाकरे आणि मनीषा वायकर यांच्या नावे कोणतेही बंगले नसल्याचं स्पष्ट केलं होतं. असे बंगले आढळल्यास मी राजकारण सोडेन असंही ते म्हणाले होते.
आता या सगळ्यामुळे मुख्यमंत्री उद्धव ठाकरे मुख्यमंत्री झाले आणि त्यांच्यामागे , शिवसेना पक्षामागे साडेसाती सुरु झाली असं दिसून येत आहे. शिवसेनेतील नेते, मंत्री इतर अनेक कारणांमुळे आजपर्यंत जनतेसमोर आले. तोडफोडीसारखे आरोप , यावरून जेलमध्ये जाणे हे शिवसैनिकांनी आधीही बघितले आहे मात्र या चौकश्या जरा वेगळ्या आहेत. त्यामुळे शिवसेना पक्ष आता पुढची वाटचाल कशी करणार, पक्षाला धक्का बसल्यावर नवीन कोणत्या उपाययोजना आखणार अशा अनेक प्रश्नांना सध्या उधाण आलं आहे.
