विजय वंजारा, प्रतिनिधी
मुंबई, 28 एप्रिल : कांदिवली येथील रायम्स ऍण्ड रम्बल्स या ‘प्लेग्रुप’ मध्ये लहान मुलांना अमानुष शिक्षा देणाऱ्या दोन शिक्षिकांना अखेर बुधवारी अटक करण्यात आली. मुलांना चिमटे काढणे, हाताला मिळेल त्याने मारहाण, मुलांना उचलून आपटणे अशी क्रूर वागणूक या दोन शिक्षिकांनी दिली होती. अमानुष वागणूक सीसीटीव्हीमध्ये कैद झाल्यानंतर दोन शिक्षिकांविरुद्ध कांदिवली पोलिस ठाण्यात बाल न्याय (मुलांची काळजी आणि संरक्षण) अभिनियम 2000 अंतर्गत गुन्हा दाखल करण्यात आला होता.
कांदिवली पश्चिमेकडे रायम्स अॅण्ड रम्बल्स प्लेग्रुप असून यामध्ये कांदिवली परिसरातील 28 मुले शिकण्यासाठी जातात. दोन ते अडीच वर्षांच्या मुलांच्या वागणुकीत अचानक बदल जाणवू लागल्याने पालकांनी संस्थाचालकांची भेट घेतली. त्यानंतर 1 मार्चपासून 27 मार्चपर्यंतच्या कालावधीतील प्लेग्रुपमधील सीसीटीव्ही फुटेज तपासण्यात आले. मुलांच्या गालाला जोरात चिमटे काढणे. हात धरून त्यांना फरफटत नेणे आणि तरीही मुले ऐकली नाहीत तर त्यांना हाताने मारहाण करणे, पुस्तकाने मुलांच्या डोक्यावर जोरजोरात मारणे असे प्रकार शिक्षिका करत असल्याचे सीसीटीव्ही फुटेजमध्ये दिसून आले. संस्थाचालकांनी याबाबतचे फुटेज दिल्यानंतर पालकांनी त्याआधारे कांदिवली पोलीस ठाण्यात तक्रार केली.
तुमच्या शहरातून (मुंबई)
कांदिवली पोलिस ठाण्यात दोन्ही शिक्षिकांविरुद्ध २ एप्रिल रोजी गुन्हा दाखल करण्यात आला होता. पोलिसांनी या प्रकरणाचे गांभीर्य लक्षात घेऊन सखोल तपास केला. सीसीटीव्ही फुटेज, पालक तसेच संस्थाचालकांचे जबाब, साक्षीदार त्याचप्रमाणे इतर पुरावे जमा करून या दोन्ही शिक्षिकांना अटक केली.
जिनल छेडा आणि भक्ती शहा अशी अटक केलेल्या शिक्षिकांची नावे असून न्यायालयाने त्यांना एक दिवसाची पोलीस कोठडी सुनावली आहे.
मराठी बातम्या, ब्रेकिंग न्यूज मराठीत सर्वात आधी News18 लोकमतवर.
आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट News18 लोकमतवर.
