भुकेल्यांना 2 घास, कल्याणकरांचा उपक्रम पाहून तुम्हीही याल मदतीला

भाग्यश्री प्रधान आचार्य, प्रतिनिधी

डोंबिवली, 11 मे : आपण फादर्स डे, मदर्स डे इतकंच काय तर व्हॅलेंटाईन डे पर्यंतचे वेगवेगळे डे साजरे होताना पाहिले आहेत. मात्र, कल्याणमध्ये दर रविवारी होणाऱ्या एका अनोख्या डे ची चर्चा आणि सोबतच कौतूकही केलं जात आहे. कल्याणमध्ये गरीब, भुकेल्या, गरजू लोकांसाठी रोटी डे साजरा केला जातो. या दिवशी याठिकाणी अन्नदान केले जाते.

आपल्या संस्कृतीमध्ये अन्नदानाला पूर्वीपासूनच मोठे महत्व आहे. भुकेल्यांना अन्न देणं यापेक्षा मोठा आनंद आणि समधान ते कोणते असू शकत नाही. ते करत असताना देणाऱ्यामध्ये उपकार केल्याची आणि घेणाऱ्यामध्ये स्वाभिमान दुखवण्याची भावना निर्माण होऊ नये तरच त्यातून दोघांनाही जे हवं आहे ते मिळू शकते. आणि याच सकारात्मक मानसिकतेतून गेल्या 5-6 वर्षांपासून कोणताही गाजावाजा न करता रोटी डे चा हा स्तुत्य उपक्रम कल्याणमध्ये राबवला जात आहे.

सीए, डॉक्टर, वकीलांसह नोकरदार व्यक्तींचा समावेश

कल्याणसह आसपासच्या परिसरात असणाऱ्या गोर गरीब लोकांना त्यातही लहान मुलांना एकदा तरी पोटभर आणि पौष्टिक जेवण मिळावे. या उद्देशाने रोटी डे ची चळवळ सुरू झाली आणि आज एक यशस्वी सामाजिक चळवळ म्हणून ती नावारूपाला आली आहे. यामध्ये कल्याण मधील सीए, डॉक्टर, वकीलांसह अनेक नोकरदार आणि नामांकित व्यक्तींचा समावेश आहे.

गोर गरीबांचे स्वप्न उतरले प्रत्यक्षात

समाजात असे अनेक जण आहेत ज्यांना पंचपक्वान्न तर दूरच पण साधं एकवेळचे पोटभर जेवणही मिळत नाही. मग श्रीखंड पुरी, आमरस पुरी, बिर्याणी आदी पदार्थ म्हणजे एक असे स्वप्न जे प्रत्यक्षात येणं केवळ अशक्यच असते. मात्र कल्याणमधील संवेदनशील व्यक्तींनी त्यांचे हे स्वप्न खऱ्या अर्थाने प्रत्यक्षात उतरवले आहे.

ज्यांनी दगडाला घडवलं, आज त्यांनाच रडवलं, डोळ्यात पाणी आणणारा डोंबिवलीतला GROUND REPORT

काय दिले जाते जेवण

दर रविवारी सकाळी आठ वाजण्याच्या सुमारास रोटी डे ची ही टीम सुमारे 300 – 400 लोकांचे जेवण तयार करून वीटभट्टी परिसर, झोपडपट्टी परिसरात पोहोचते. पुरी भाजी, श्रीखंड, एखाद फळ, मसाले भात किंवा बिर्याणी, आईसक्रीम, केक, बिस्किटचे पुडे, उपमा, पोहे, शिरा कधी वडा पाव, ढोकळा असे विविध पदार्थांचे वाटप केले जाते.