पुणे 28 मार्च : राज्यात गुन्हेगारीच्या घटनांमध्ये दिवसेंदिवस वाढ होत असल्याचं दिसत आहे. पुण्यातही मारहाण, हत्या, अपहरण अशा अनेक घटना सातत्याने समोर येत राहतात. अशातच आता पुण्यातून आणखी एक हादरवणारी घटना समोर आली आहे. या घटनेत आईनेच पोटच्या चार वर्षीय मुलीचा चाकूने भोसकून खून केल्याचा प्रकार समोर आला आहे. ही घटना हडपसर परिसरात घडली.
आपल्या मुलांना प्रत्येक संकटातून सुखरूप बाहेर काढण्यासाठी आई काहीही करू शकते, असं म्हटलं जातं. याची अनेक उदाहरणंही आपण पाहिली आहेत. मुलांना वाचवण्यासाठी अनेकदा ती स्वतःचा जीव धोक्यात टाकते. अशातच पुण्यातून समोर आलेल्या या धक्कादायक घटनेनं मात्र सगळ्यांनाच हादरवून सोडलं आहे. वैष्णवी महेश वाडेर ( वय ४ ) असं खून झालेल्या मुलीचं नाव आहे.
पत्नीचा राग 15 महिन्यांच्या चिमुकलीवर; दोघांच्या वादात लेकीचा बळी
तुमच्या शहरातून (पुणे)
याप्रकरणी तिची आई कल्पी हिला हडपसर पोलिसांनी ताब्यात घेतलं आहे. ही घटना सोमवारी ( 27 मार्च) रात्री सव्वा नऊ वाजताच्या सुमारास हडपसर येथील सिद्धिविनायक दुर्वांकुर सोसायटी ससाणे नगर येथे घडली आहे. मुलीचा खून कोणत्या कारणातून केला, हे मात्र अद्याप समजू शकलं नाही. आरोपी कल्पना ही तिच्या मुलीसोबत एकटीच राहत होती.
23 दिवसांपूर्वी संबंधित कुटुंबीय तिथे राहण्यास आले होते. महिला बेकरी प्रॉडक्ट विक्रीचा व्यवसाय करत होती. कल्पना सोमवारी भाड्याचे घर खाली करणार होती. त्यामुळे घरमालक तिथे गेले होते. त्यावेळी तिने दरवाजा आतून बंद करून घेतला होता. शेजारच्यांनी तिला दरवाजा उघडण्यास सांगितलं. घरमालक आणि शेजाऱ्यांनी आत जाऊन पाहिलं असता मुलीचा मृतदेह दिसून आला. यानंतर त्यांनी तत्काळ याची माहिती नियंत्रण कक्षाला दिली. यावर हडपसर पोलिसांनी घटनास्थळी धाव घेत महिलेला ताब्यात घेतलं आहे. या हत्येमागील कारणाचा शोध घेतला जात आहे.
मराठी बातम्या, ब्रेकिंग न्यूज मराठीत सर्वात आधी News18 लोकमतवर.
आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट News18 लोकमतवर.
