धनंजय दळवी, प्रतिनिधी
मुंबई, 28 एप्रिल : मुंबई म्हटलं की मोठमोठ्या इमारती, मोठमोठे बिजनेस पार्क, एक अतिशय पॉश शहर सर्वांच्या डोळ्यासमोर येतं. देशाच्या आर्थिक राजधानी अशी देखील या शहराची ओळख आहे. मात्र, आशिया खंडातील सगळ्यात मोठी झोपडपट्टी धारावी देखील याच मुंबईत आहे. धारावीसारख्या अनेक लहान लहान झोपडपट्ट्या या मुंबईच्या कुशीत वसल्या आहेत. झोपडपट्टीतील मुलांच्या हाताला काम न मिळाल्याने ती व्यसन किंवा गुन्हेगारीच्या आहारी जाण्याचा धोका असतो. हाच धोका टाळण्यासाठी मुंबईच्या झोपडपट्टीतून मोठा झालेल्या एका तरुणानं पुढाकार घेतला आहे. उदय पवार यानं एक खास टिंग टॉंग नावाचं अॅप बनवलं असून तो त्या माध्यमातून तरुणांना नोकरी देण्याचा प्रयत्न करतोय.
झोपडपट्टीतून पुढे आलेला उद्योजक उदय पवार
तुमच्या शहरातून (मुंबई)
झोपडपट्ट्यांमध्ये राहणारी मुलं गुन्हेगारी आणि व्यसनाच्या आहारी जाण्याचं मुख्य कारण बेरोजगारी असतं. या मुलांच्या अंगात कला आहे मात्र शिक्षण नाही. यांच्या कलेनुसार एखादं काम मिळेल अशी सोय नाही. त्यामुळे या मुलांच्या मदतीसाठी मुंबईच्या जिजामाता नगर येथील झोपडपट्टीत राहणारा एक तरुण उद्योजक पुढे आला आहे. या तरुण उद्योजकाचं नाव उदय पवार असून तो या मुलांच्या उज्वल भविष्यासाठी प्रयत्न करत आहे. झोपडपट्टी मध्ये राहणाऱ्या मुलांना रोजगार मिळावा म्हणून उदय पवार या तरुणाने टिंग टॉंग नावाचं ॲप तयार केले असून या ॲपद्वारे या तरुणांना रोजगार देण्याचा प्रयत्न उदय करत आहे.
मोठ्या प्रमाणात बेरोजगारी
याबाबत माहिती देताना उदय यांनी सांगितलं की, “जिजामाता नगरच्या झोपडपट्टीतून मी लहानाचा मोठा झालो. मात्र, आम्ही जेव्हा सांगायचो की आम्ही अशा ठिकाणी राहतो. तेव्हा मात्र लोकांच्या बघण्याच्या नजरा बदलायच्या. अनेकांना वाटतं की झोपडपट्टीत राहणारे म्हणजे सर्वच बिघडलेले असतात. मात्र, तसं नाही. इथे राहणाऱ्या प्रत्येकाकडे विविध गुण आहेत कला आहेत. मात्र, त्या आम्हाला दिसतात आणि बाहेर राहणाऱ्यांना दिसत नाहीत हाच काय तो फरक. मला हे चित्र बदलायचं होतं. मी माझ्या तरुण वयातच सामाजिक कामात स्वतःला झोकून दिलं. त्यावेळी अनेकांचे आई-वडील, पत्नी भावंड सांगायची माझा भाऊ बहीण बेरोजगार आहे. माझा पती बेरोजगार आहे. त्यांना कुठे काम असेल तर कृपया मला सांग. आता या प्रत्येकाला मी काम देऊ शकत नव्हतो. त्यावेळी माझ्या मनात एक बिझनेस ॲप बनवण्याची संकल्पना आली.”
आयटी इंजिनियर मित्रांनी केली मदत
पुढे बोलताना उदय सांगितात की, “टिंग टॉंग हे ॲप बनवण्याची संकल्पना मी माझ्या काही मित्रांना सांगितली. मी काही इंजिनिअर नाही. त्यामुळे मला माझ्या मित्रांची मदत घेणं आवश्यक होतं. मी एक साधा अकरावी पास तरुण आहे. मात्र, माझी संकल्पना माझ्या आयटी इंजिनियर मित्रांना आवडली आणि त्यांनी मला मदत केली. या ॲपमध्ये आम्ही मुंबई सोबतच इतर शहरांमधील देखील व्यावसायिकांना जोडण्याचा प्रयत्न करत आहोत. या टिंग टॉंग ऑनलाईन ॲपमध्ये तुम्हाला दैनंदिन वापरासाठी किंवा मदतीसाठी जे काही लागतं ते सर्व मिळेल.”
समृद्धी महामार्गावरुन प्रवास करण्यापूर्वी टायर तपासा… अन्यथा होवू शकतो पश्चताप, Video
मुंबईतील वेंडरचं सध्या रजिस्ट्रेशन सुरू
या ॲप बाबत माहिती सांगताना उदय पवार यांनी सांगितलं की, “तुम्हाला रोजच्या दैनंदिन जीवनात गरजेसाठी जे काही आवश्यक असतं ते तुम्हाला या ॲप मध्ये मिळेल. म्हणजे तुमच्या घरात एखादी व्यक्ती आजारी असल्यास तुम्हाला नजीक कोणता दवाखाना आहे हॉस्पिटल आहे याची माहिती हवी असेल तर ती या ॲप मध्ये मिळेल. तुम्हाला प्लंबर, इलेक्ट्रिशन इतकच काय वकील, सीए अशा सर्वच गोष्टी तुम्हाला या ॲपमध्ये मिळतील. तुम्हाला तुमच्या घराजवळ एखादा पाणीपुरीवाला आहे का? याची माहिती देखील तुम्हाला या ॲप मध्ये मिळेल. त्यासाठी आम्ही मुंबईतील या वेंडरच रजिस्ट्रेशन आमच्या ॲप मध्ये करत आहोत. त्यामुळे अनेकांना घरबसल्या रोजगार मिळत आहे.”
दिवसाला फक्त 1 रुपया रजिस्ट्रेशन फी
उदय पवार यांनी सांगितलं की, “मला माहितीये मी ज्या प्रकारचं एप्लीकेशन तयार केलंय अशाच प्रकारची मोठमोठ्या कंपन्यांची ऍप्लिकेशन मार्केटमध्ये आहेत. मात्र, या कंपन्यांच्या ऍप्लिकेशनमध्ये तुम्हाला तुमचा व्यवसाय रजिस्टर करायचा झाल्यास त्यासाठी लागणारे चार्जेस अधिक आहेत. सोबतच या कंपन्यांकडून तुम्हाला काम मिळाल्यास त्यांना कमिशन देखील द्यावं लागतं. एकतर छोटे वेंडर आणि त्यांची कमाई ही अतिशय कमी असते. त्यात झोपडपट्टीत राहणाऱ्या स्ट्रीट वेंडरची कमाई तर अतिशय तुटपुंजी असते. मग त्यांचे कामाचा मोबदला हा जर या कंपन्यांच्या रजिस्ट्रेशन आणि कमिशन मध्ये जात असेल तर त्याचा त्याला फायदा होत नाही. म्हणून मी माझ्या ॲपमध्ये कोणतेही कमिशन ठेवलेलं नाही. इथं तुम्हाला रजिस्ट्रेशनची देखील एकदम माफक फी आहे. तुम्हाला दिवसाचा एक रुपया म्हणजेच वर्षाचे फक्त 365 रुपये इथे रजिस्ट्रेशन फी आहे. त्यामुळे हे सर्वांना परवडणार एप्लीकेशन आहे.”
मराठी बातम्या, ब्रेकिंग न्यूज मराठीत सर्वात आधी News18 लोकमतवर.
आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट News18 लोकमतवर.
