राज्यात सत्तानाट्य सुरु असतानाच महाविकास आघाडी सरकारचे उपमुख्यमंत्री अजित पवार यांना कोरोनाची लागण झाली होती. अजुनही ते कोरोना पॉझिटिव्ह आहेत.
राज्यात सत्तानाट्य सुरु असतानाच महाविकास आघाडी सरकारमधील तत्कालीन उपमुख्यमंत्री अजित पवार यांना कोरोनाची लागण झाली होती. पण, अजुनही कोरोना पॉझिटिव्ह आहेत. काही दिवसांपूर्वी अजित पवारांना कोरोनाची लागण झाली होती. त्यांचा कोरोना अहवाल पॉझिटिव्ह आला होता, त्यामुळे ते आयसोलेशनमध्ये होते. अशातच काल (शुक्रवारी) पुन्हा अजित पवारांची कोरोना चाचणी करण्यात आली. पण त्यांचा अहवाल अद्याप पॉझिटिव्ह असल्याची माहिती मिळत आहे.
राज्यातील सत्तासंघर्षामध्ये महाविकास आघाडीला धक्क्यांवर धक्के मिळत आहेत. अशातच 3 आणि 4 जुलै रोजी संसदेचं विशेष अधिवेशन बोलावण्यात आलं आहे. या अधिवेशनात नव्या सरकारला बहुमत सिद्ध करावं लागणार आहे. त्यासाठीच अजित पवारांनी आपली कोरोना चाचणी केली होती. अशातच अजित पवार बहुमत चाचणीसाठी उपस्थित राहणार असल्याची माहिती मिळत आहे. खबरदारी घेऊन ते फ्लोअर टेस्टमधे सहभागी होणार असल्याच सांगितलं जातंय.
एकनाथ शिंदे यांनी काही आमदारांसह बंड पुकारलं आणि राज्यातील सत्तासंघर्षाला सुरुवात झाली. वारंवार आवाहन केल्यानंतर शिंदे गट आपल्या भूमिकेवर ठाम असल्याचं पाहायला मिळालं. त्यानंतर मात्र राजकीय हालचालींनी वेग घेतला. उद्धव ठाकरेंनी आपल्या मुख्यमंत्रीपदाचा त्याग केला आणि राज्यात सत्तेत असलेलं महाविकास आघाडी सरकार कोसळलं. लगेच दुसऱ्याच दिवशी राज्यात दुसरं सरकार स्थापन झालं. मुख्यमंत्री म्हणून एकनाथ शिंदेंनी आणि उपमुख्यमंत्री म्हणून देवेंद्र फडणवीसांनी शपथ घेतली. पण शपथविधीवेळी फक्त मुख्यमंत्री आणि उपमुख्यमंत्र्यांनी शपथ घेतली होती. पण येत्या अधिवेशनात नवनिर्वाचित सरकारला बहुमत सिद्ध करावं लागणार आहे
