माजी मंत्री विजय वडेट्टीवार यांच्या पुढाकारातून ब्रम्हपुरी महोत्सवात दोनदिवसीय शिबिर संपन्न
ब्रह्मपुरी, प्रतिनिधी : सध्याच्या धावपळीच्या युगात अन्न उत्पादन प्रक्रियेत रासायनिक खते, द्रव्यांच्या अधिक वापर तसेच बदललेल्या जीवनशैलीमुळे मोठ्या प्रमाणात याचा आरोग्यावर विपरित परिणाम होऊन विविध प्रकारच्या आजाराने नागरिकांना ग्रासले आहे. यासाठीच समाजातील गोरगरीब जनतेच्या आर्थिक अडचणी जाणून घेत गेल्या अनेक वर्षापासून आरोग्य सेवेचा वारसा पुढे नेत राज्याचे माजी मंत्री व ब्रम्हपुरीचे आमदार विजय वडेट्टीवार यांनी ब्रह्मपुरी महोत्सवादरम्यान सलग दोन दिवसीय महाआरोग्य शिबिराचे आयोजन केले होते. यामध्ये एकूण चार हजाराहून अधिक रुग्णांनी या शिबिराचा लाभ घेतला.
माजी मंत्री आ. विजय वडेट्टीवार यांच्या पुढाकारातून ब्रम्हपुरी महोत्सवांतर्गत आयोजित दोनदिवसीय महाआरोग्य शिबिराला वैद्यकीय क्षेत्रातील नामवंत महात्मे रुग्णालय, नागपूर येथील नेत्ररोग तज्ज्ञ डॉक्टरांकडून १२५३ रुग्णांची तपासणी करण्यात आली. यापैकी ३०९ रुग्णांवर मोतिबिंदू शस्त्रक्रिया करण्यात येणार आहे. तर यावेळी २५०० रूग्णांना मोफत चष्मे वाटप करण्यात आले. राष्ट्रसंत तुकडोजी महाराज कॅन्सर रुग्णालय, नागपूर अंतर्गत अत्याधुनिक कॅन्सर डिटेक्टिव्ह व्हॅन या अत्याधुनिक यंत्राद्वारे सुसज्ज कर्करोग निदान वाहनांमध्ये एकूण ३९६ महिला रुग्णांची तपासणी करण्यात आली. यामध्ये मुखाचा कर्करोग, गर्भाशय मुखाचा कर्करोग, स्तनाचा कर्करोग, मामोग्राफीद्वारे तपासणी करण्यात आली. ११२ रुग्ण हर्निया व २७ हायड्रोसिल रुग्णांवर मोफत शस्त्रक्रिया करण्यात येणार आहे.
तसेच इतर हजारो रुग्णांच्या आरोग्य तपासणी दरम्यान रक्त तपासणी, थुंकी तपासणी व इतर तपासण्या करून सर्वांना मोफत औषधी वितरण, हजारो रुग्णांची मोफत भोजन व्यवस्था करण्यात आली. यशस्वीतेसाठी ब्रह्मपुरी महोत्सव आरोग्य समितीचे डॉ. सतीश कावळे, डॉ. वंजारी, डॉ. गेडाम, अॅड. गोविंद भेंडारकर तसेच ब्रह्मपुरी महोत्सव समिती, काँग्रेस कमिटी, नगर परिषदेचे सर्व पदाधिकारी व कार्यकर्त्यांनी परिश्रम घेतले.
