ICMR Cyber Attack : सायबर हल्ला करणाऱ्या हॅकर्सचा प्रयत्न फसला असून त्यांना योग्य वेळी थांबवण्यात आलं, असं एका अधिकाऱ्याने सांगितलं.
ICMR Cyber Attack : दिल्लीतील एम्स (AIIMS) हॉस्पिटलच्या वेबसाईटवर सायबर हल्ला झाल्यानंतर आता भारतीय वैद्यकीय संशोधन परिषद म्हणजे आयसीएमआर (ICMR) या केंद्र सरकारच्या आरोग्य संशोधन संस्थेच्या वेबसाइटला काही हॅकर्सने लक्ष्य केलं आहे. अधिकाऱ्यांनी दिलेल्या माहितीनुसार, हॅकर्स आयसीएमआरच्या वेबसाईटवर सायबर हल्ला करण्याचा सतत प्रयत्न करत आहेत. पण संस्थेच्या टीमने वेळीच सावध होत हॅकर्सना प्रतिबंध केला. राष्ट्रीय विज्ञान केंद्र (NIC) च्या अधिकाऱ्यांनी दिलेल्या माहितीनुसार, 30 नोव्हेंबर रोजी 24 तासांत आयसीएमआरच्या वेबसाईटवर 6000 हून अधिक वेळा सायबर हल्ला करण्याचा प्रयत्न करण्यात आला, पण हॅकर्सचा हल्ला अयशस्वी ठरला.
ICMR ची वेबसाईट हॅक करण्याचा होता डाव
एका सरकारी अधिकाऱ्याने सांगितलं की, हाँगकाँगस्थित आयपी अॅड्रेसवरून हॅकर्सनी 30 नोव्हेंबर रोजी 24 तासांत सुमारे 6000 वेळा IMCR ची वेबसाइट हॅक करत त्यामध्ये घुसण्याचा प्रयत्न केला. एम्सच्या (AIIMS) वेबसाईटवर सायबर हल्ला झाल्यानंतर आता आयसीएमआरला लक्ष्य करण्यात आलं आहे.
आधी एम्सचे सर्व्हर केले हॅक
गत 24 नोव्हेंबरला अखिल भारतीय आयुर्विज्ञान संस्थेचं (एम्स) सर्व्हर डाऊन झालं. त्यानंतर रुग्णालयाच्या डेटाबेसवर सायबर अटॅक झाल्याची माहिती समोर आली. आता हॅकर्सनी ‘एम्स’कडे तब्बल 200 कोटींहून अधिक खंडणीची मागणी केली होती. हॅकर्सने दावा केला होता की, चोरलेल्या डेटाबेसमध्ये मंत्र्यांसह महत्त्वाच्या व्यक्तींची माहिती आहे. या सायबर हल्ल्यामुळे सायबर सुरक्षा यंत्रणेवर प्रश्नचिन्ह उपस्थित झालं आहे, सध्या या प्रकरणाचा तपास सुरु आहे.
आरोग्य विभागांच्या वेबसाईटवरील हल्ल्यामध्ये वाढ
सरकारी अधिकाऱ्यांनी सर्व सरकारी संस्थांना त्यांची ऑपरोटिंग सिस्टिम अपडेट करण्यास सांगितली आहे. हॅकर्स सायबर हल्ल्यासाठी संधी शोधत आहेत. अधिकाऱ्यांनी सांगितलं की, आरोग्य संस्थांच्या वेबसाईटवर असणारी रुग्णांची माहिती हॅकर्सच्या निशाण्यावर आहे. आरोग्य विभागांच्या वेबसाईटवरील हल्ल्यामध्ये 2020 पासून वाढ झाली आहे.
