Hind Kesari : महाराष्ट्र केसरी विजेता पैलवान अभिजीत कटके (Abhijit Katke) याने हिंदकेसरी खिताब पटकावला. हैदराबाद येथे झालेल्या हिंदकेसरी कुस्ती स्पर्धेतील अंतिम फेरीत हरियाणाच्या सोमवीरचा 5-0 असा पराभव करत अभिजीत कटकेने खुल्या गटातून हा मान मिळवला आहे.
भारतीय शैली कुस्ती महासंघाच्या वतीने हैद्राबाद येथे हिंदकेसरी कुस्ती स्पर्धेचे आयोजन करण्यात आलं होते. अभिजीतने पटकावलेला हिंदकेसरीचा किताब म्हणजे महाराष्ट्राच्या शिरपेचात मानाचा तुरा रोवणारी आणि तितकीच अभिमानाची बाब आहे. दरम्यान, अभिजीतच्या विजयानंतर संपूर्ण महाराष्ट्रात जल्लोष साजरा केला जातोय. तसेच अभिजीतच्या मुळ गावीदेखील फटाके फोडून जल्लोष साजरा केला गेला. भारतीय कुस्तीतील सर्वोच्च मानाची स्पर्धा म्हणजे हिंद केसरी, आणि या हिंद केसरी सामन्याचा अंतिम सामना रविवारी खेळला गेला.
प्रतिस्पर्धी पैलवानाला एकही गुण मिळू दिला नाही
पहिल्या फेरीत चार गुणांची आघाडी घेतलेल्या अभिजीतने सोमवीरला आक्रमणाची संधीच मिळून दिली नाही. तर सोमवीरला दुसऱ्या फेरीतदेखील नकारात्मक कुस्ती करत असल्याने पंचांनी सूचना देऊन तीस सेकंदात गुण घेण्याची सूचना दिली. मात्र तीस सेकंदात तो अभिजीतचा भक्कम बचाव भेदण्यात अयशस्वी ठरल्याने पंचांनी अभिजीतला एक गुण दिला. शेवटच्या मिनिटांत सोमवीर आक्रमक झाला. परंतु, अभिजित त्याला एकही गुण मिळू न देता हिंदकेसरीची गदा पटकावली.
अभिजित एकवेळा महाराष्ट्र केसरी, तर दोनदा उपमहाराष्ट्र केसरी
अभिजीत याने या पूर्वी दोन वेळा उपमहाराष्ट्र केसरी तर एकवेळा महाराष्ट्र केसरीचा बहुमान पटकावला आहे. त्यानंतर त्याने हिंद केसरीची मानाची गदा पटकावून महाराष्ट्राच्या शिरपेचात मानाचा तुरा रोवला आहे. राष्ट्रवादीचे नेते अजित पवार, जयंत पाटील व क्रीडा आणि अन्य क्षेत्रातील विविध मान्यवरांनी अभिजीतचे अभिनंदन केले.
विजयानंतर काय म्हणाला अभिजीत ?
2017 सालच्या कुस्ती स्पर्धेत मला हार पत्करावी लागली होती. त्यानंतर सलग चार वर्षे मेहनत करून मी हा किताब पटकावला आहे. माझ्या प्रशिक्षकांनी सांगितली तशी मी कुस्ती केली, या विजयाने मला खूप आनंद झालाय. हैदराबादहून आज पुण्यात पोहोचल्यानंतर तेथे या विजयाचा आनंद साजरा केला जाणार आहे, अशा भावना अभिजीत याने माध्यमांशी बोलताना व्यक्त केली आहे.
