मुंबई : राज्याचे माजी मंत्री धनंजय मुंडे यांच्या नावाने मंत्रालयात बोगस भरतीचा धक्कादायक प्रकार सुरू असल्याचं नुकतंच उघडकीस आलंय. याप्रकरणी मंत्रालयातील एका कर्मचाऱ्यासह तिघांविरोधात गोवंडी पोलीस ठाण्यात गुन्हा दाखल करण्यात आला आहे.
पालिकेतून सेवानिवृत्त झालेले यशवंत लक्ष्मण कदम (वय ६७) यांच्या तक्रारीनुसार स्थानिक पोलिसांनी गुन्हा नोंदवला आहे. लक्ष्मण कदम हे गोवंडी येथे पत्नी आणि दोन मुलांसोबत राहतात. कदम यांच्या एम.एस.सी. झालेल्या मुलाला नोकरी मिळण्यासाठी ते प्रयत्न करत होते. त्यांचा लहान मुलगा रत्नजीत कदम याने व्हॉट्सॲपवर सरकारी नोकरी संदर्भातील जाहिरात बघून निखिल माळवे याच्याशी संपर्क साधला. माळवे याने त्याला थेट मंत्रालयातील सामाजिक न्याय विभागात लिपीक पदावर नोकरी लावण्याचे आमिष दाखवले. सुरुवातीला मुलाखतीसाठी ३० हजारांची तर कायमस्वरूपी नोकरी लावण्यासाठी साडेसात लाख रुपयांची मागणी केली.
माळवे याने सोशल मीडियावर धनंजय मुंडे हे सामाजिक न्याय मंत्री असताना त्यांच्या कार्यालयाबाहेर काढलेले फोटो सोशल मीडियावर ठेवून विश्वास संपादन केला होता. मुलाच्या भविष्याचा प्रश्न, म्हणून कदम पैसै देण्यास तयार झाले. त्यासाठी पत्नीचे दागिने गहाण ठेवून कदम यांनी माळवेला ७ लाख ३० हजार रुपये दिले. पुढे रत्नजीतला मंत्रालयात मुलाखतीसाठी बोलावून तेथे शुभम मोहिते याच्याशी भेट घालून दिली. मोहितेने मुंडे यांच्या कार्यालयात शिपाई असल्याचे सांगितले. मोहितेही आपल्या व्हॉट्सअप डीपीला मुंडेंच्या फोटोचा वापर करत होता.
मंत्रालयात भेटीगाठी झाल्यानंतर कांबळे नावाच्या व्यक्तीला भेटून कागदपत्रे दिली, ती त्याने तपासली. आणि १ डिसेंबर २०२१ रोजी धनंजय मुंडे यांच्या नावाचे बनावट आदेशपत्र रत्नजीतला मेल केले. रत्नजीतची तात्पुरत्या स्वरूपात निवड झाली असून २९ जानेवारी २०२१ पर्यंत सदर कार्यालयात उपस्थित राहून नोकरी आदेश प्राप्त करून सेवेस प्रारंभ करण्यास सांगितल्याचे नमूद होते, त्यामुळे त्यांचा विश्वास बसला. ठरलेल्या तारखेनुसार, कदम यांचा मुलगा मंत्रालयात गेला. मात्र तेथे शुभमचा फोन नॉट रिचेबल होता. तसेच तो मुंडे यांच्यासोबत दौऱ्यावर गेला असल्याचा बहाणा करून चालढकल केली. त्यानंतर निलेश कुडतरकर नावाच्या व्यक्तीने कॉल करून मंत्रालयातील काम १०० टक्के होणार असल्याचे आश्वासन दिले. मात्र शेवटी आपली फसवणूक झाल्याचे लक्षात येताच त्यांनी पोलिसांत धाव घेत तक्रार नोंदवली.
याप्रकरणी निखिल माळवे, शुभम मोहिते आणि निलेश कुडतरकर या तिघांविरोधात गुन्हा नोंदवून आरोपी माळवेला अटक करण्यात आलेली आहे. या प्रकरणात मंत्रालयातील कुठल्या कर्मचाऱ्याचा सहभाग आहे का ? याबाबत अधिक शहानिशा सुरू असल्याचे स्थानिक पोलीस करत आहे.
