Sharad pawar : ‘नेते रडले, पाया पडल्या’, अखेर शरद पवार निवृत्तीवर ठामपणे म्हणाले

मुंबई, 02 मे : ‘मी जे सांगितलं, आपण सगळे एकत्रित काम करणार आहोत. मी फक्त पदावरून बाजूला होत आहे. तुमच्यापासून मी बाजूला जात नाही’ असं म्हणत राष्ट्रवादीचे अध्यक्ष शरद पवार यांनी आपण आपल्या निर्णयावर ठाम असणार असल्याचे स्पष्ट केलं.

‘लोक माझा सांगाती’ या पुस्तकाच्या प्रकाशन सोहळ्याच्या दिवशी राष्ट्रवादीचे सर्वसर्वा शरद पवार यांनी मोठी घोषणा केली आहे. कुठे थांबायचं हे मला कळतं, म्हणून एनसीपीच्या अध्यक्षपदावरुन निवृत्त होणार असल्याची घोषणा यावेळी शरद पवार यांनी केली.

त्यांच्या या घोषणेनंतर राजकीय वर्तुळात खळबळ उडाली. यानंतर आता नवा अध्यक्ष कोण होणार यावरुन चर्चांना उधाण आलं आहे. राष्ट्रवादीचे अध्यक्ष शरद पवार यांच्या ‘लोक माझे सांगाती’ या पुस्तकाच्या दुसऱ्या भागाचे आज प्रकाशन झाले. या पुस्तकात शरद पवार यांनी अनेक खळबळजनक खुलासे केल्याची चर्चा आहे. या सोहळ्यात शरद पवारांच्या निवृत्तीच्या घोषणेमुळे कार्यकर्त्यांना धक्काच बसला आहे.

तर, अजित पवार यांनी शरद पवार यांच्या निर्णयाला विरोध करणाऱ्या कार्यकर्ते आणि नेत्यांना सुनावताना म्हटलं की, साहेबांच्या डोळ्यादेखत अध्यक्ष तयार झाला तर तुम्हाला का नको? साहेब देशात, महाराष्ट्रात फिरणारच आहेत. त्यांचे मार्गदर्शन आपल्याला असणारच आहे. पवार साहेब अध्यक्ष नाहीत म्हणजे पक्षात नाहीत असं नव्हे. शरद पवार यांनी निर्णय घेतला आहे. भावनिक होऊ नका. आपण नव्या अध्यक्षाच्या पाठीशी उभे राहू असं आवाहन अजित पवार यांनी केलं.

राष्ट्रवादीचा पुढचा अध्यक्ष कोण? पवारांनी निर्णय सोपवला ‘या’ नेत्यांच्या हाती 

कुणीही भावनिक होण्याचं कारण नाही. हा प्रसंग कधी ना कधी येणारच होता. कालच हे जाहीर करायचं होतं. साहेबांनी त्यांचा निर्णय जाहीर केला आहे. त्यांच्या मनात जे आहे तेच आपण करू. तुम्ही कुठेही बोलावलं तरी मार्गदर्शन ते करतील. नव्या अध्यक्षाच्या मागे आपण उभा राहू असं अजित पवार यांनी म्हटलं.

तुम्ही गैरसमज करून घेतायत. पवार साहेबांच्या वयाचा विचार करता. साहेबांशी आणि सर्वांशी चर्चा करून नव्या नेतृत्वाकडे जबाबदारी देण्यात येणार आहे. साहेबांच्या मार्गदर्शनाखाली पक्ष नेतृत्व काम करेल. आपल्याला वेळोवेळी मार्गदर्शन करतील. पवारांच्या मार्गदर्शनाखालीच नेतृत्व काम करेल. साहेब अध्यक्ष असो किंवा नसो, आपला परिवार पुढे चालत राहणार आहे. भाकरी फिरवायची असते असं ते म्हणाले होते. मी काकींशी बोललो, ते कदापि माघार घेणार नाहीत असंही अजित पवार यांनी यावेळी सांगितलं.