शिवसंग्राम संघटनेला राजकीय ताकद देण्यासाठी विनायक मेटे यांच्या पत्नीला आमदार करा, अशी मागणी माजी खासदार संभाजीराजे छत्रपती यांनी मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्याकडे केली आहे. संभाजीराजे छत्रपती यांनी आज म्हणजेच, 21 ऑगस्ट रोजी विनायक मेटे यांच्या कुटुंबीयांची भेट घेतली. त्यावेळी संभाजीराजेंनी विनायक मेटे यांच्यासोबत मराठा आरक्षणासंदर्भात केलेल्या कामाच्या आठवणीला उजाळा दिला. मी सदैव मेटे कुटुंबियांच्या सोबत असून विनायक मेटे यांचा अपूर्ण राहिलेला मराठा आरक्षणाचा लढा पुढे घेऊन जाणार असल्याचंही त्यांनी कुटुंबीयांसोबत चर्चा करताना सांगितलं. मेटे कुटुंबियांची भेट घेण्यासाठी संभाजीराजे छत्रपती मेटे यांच्या घरामध्ये दाखल होताच त्यांच्या बहिणीने टाहो फोडला. “माझ्या भावाने मराठा आरक्षणासाठी आयुष्य खर्ची घातलं. त्याचा लढा आता तुम्ही पुढे चालू ठेवा, अशी भावनिक साद यावेळी त्यांनी संभाजीराजे छत्रपतींना घातली.
यावेळी बोलताना संभाजीराजे म्हणाले की, “विनायक मेटे यांच्या शिवसंग्राम संघटनेला राजकीय ताकद देण्यासाठी त्यांच्या पत्नीला तात्काळ आमदार करण्यात यावं. मेंटेनी मराठा समाजासाठी, मराठा आरक्षणासाठी आणि शिवस्मारकासाठी हयातभर काम केलं आणि त्यांचे हेच काम आम्ही पुढे घेऊन जाणार आहोत.”
राज्यातल्या शेतकऱ्यांच्या प्रश्नावरुन काय म्हणाले संभाजीराजे ?
ते म्हणाले की, “तेलंगणाच्या धर्तीवर शेतकऱ्यांना ज्या काही योजना मिळत आहेत तशाच योजना महाराष्ट्रातल्या शेतकऱ्यांना दिल्या पाहिजेत. अनेकदा आर्थिक विवंचनेतून नापिकी आणि अतिवृष्टीमुळे शेतकरी आत्महत्या करतात तर त्यांना तेलंगणाच्या धर्तीवर ज्या योजना ते सरकार पुरवते त्याच योजना महाराष्ट्र सरकारने जर दिल्या तर महाराष्ट्रातल्या शेतकरी सुजलाम सुफलाम होतील.”
